TULAD MO RI'Y ALON...

By Nepthali Paraiso 19-Sept-13

Ano nga bang pinagdadaanan, sa alon bay nagsasalinbayan

mga pangarap at kapighatian na aking nararanasan

Saan nga ba hahantong at kailan ka hihinahon

Ang karanasan na narararamdaman sa alon bay naroon?

Pangarap na gustong maabot, kapalit ang dusa't poot;

mga karanasang dulot, sa pagtatrabaho sa laot;

Kailan mo aalisin, itong mga homesick namin;

Salamat sa kaibigang, kahit sa malayo'y nariyan;

Salamat din sa kalakasan, Dios ang syang nagbibigay;

Para sa aming kinabukasan, kailangang naming paglabanan

Itong ganitong mga bagay, sa mga marino'y tiis tiis lang;

At sa aming pagbabalik, kaligayahan sa mahal sa buhay.

Ang inyo ngang nararamdaman, sa puso nami’y nariyan

Kaya kaming mga makata, sa panulat ay lalathala;

Ano nga ba ang nanaisin, na kayo'y bigyan ng pansin;

Dito na lang nating dadaanin, mga karanasang sasapitin

Bakit nga ba dumadating, mga ganitong damdamin

Pwede bang sa kasayahan at puro na lang tawanan

At sa pagsapit ng dilim, kapalit ay kalungkutan

Kailan mo kami tatantanan, kami’y iyong kalimutan

At sa pagsapit ng kinaumagahan, muli na naman sisilayan

Hahanapin at hahanapin itong aking mga kaibigan

Wag na sanang matapos ang ganitong kalagayan

Na syang nagpapasaya sa min, kahit panandalian lamang

SA MGA BAGO KONG KAIBIGAN

 by Nepthali Paraiso 14-Sept13 1:30pm

Ang mga bago kong kaibigan sa crewtoo nagkakilanlan

Masasayang tawanan at maraming kulitan

Si itlog, ampalaya, kamatis, asin at may sabaw pa

Naluto ang ulam sa matamis na pagsasamahan

Mga puntos na nakukuha aba silay nagtatagisan na

Nag-uunahan sa pagsulong, naging popular na tuloy

Di man maka abante walang sawa sa pag responde

Ma mi miss mo tuloy ang grupo pag nawala sa sirkulasyon

May kanya kanyang pinagmulan, ibat ibang lugar na pinanggalingan

Ibat ibang antas ng pinag aralan, edad ay hindi hadlang

Mga plano sana’y matuloy, pagkakaisa’y aking hinahamon

Upang sa paglayag at maging alon, nakatayo pa rin at sumusulong

Natutuwa ako sa mga taong ito na ngayon ay parang isang grupo

At sa darating na araw, kami’y magkikita’t lubusang magkakakilanlan

Wag na sanang maging hadlang ang pera o hirap man

Ang sabi nga’y may paraan kung gusto at kailangan

Hangad ko sa mga taong ito na pag-aaral ay magsikhay

Na tulad din namin marating nila ang tagumpay

Sa umpisa ay talagang mahirap, tyaga tiis lang ang kailangan

Upang sa darating na buhay, makamtan mo ang yong pinaghirapan

SA AKING KAARAWAN

By Nepthali P. Paraiso, 7-25-13 6:20pm

Isa na namang taon ang nadagdag sa edad

At nagpapasalamat sa Diyos na Dakila’t tapat

Taglay ang kalakasan at kasayahan

Sa patuloy Nyang pagpapatnubay

Maraming pagbati ang aking ngang natanggap

Mula sa mga kaibigang patuloy na nakaaalala

Hindi ko man mabuksan ang Facebook sa twina

Dahil hindi nga allowed dito sa opisina

Kay Ate Malou Roa at Kay Nancy De Guia

Kay Marvin, Kay Laluna at sa iba pa

Maraming Salamat sa mga pagbati

Tunay na ako’y talagang napapangiti

Hindi ko man mabanggit ang iyong mga pangalan

Ang hirap kasing tumula’t “mag rhyme”

Taos pusong pasasalamat sa inyong lahat

Pagpapalain din kayo’t patnubayan ng Maykapal

Maraming handaan dito sa hapag kainan

Na kung saan “Eat all You Can” ika’y masisiyahan

Masasarap na pagkain o kay talagang kay inam

Maraming mga prutas  at ikaw ay lalakas

Ang akin ngang imbitado ang lahat ng empleado

Ang kabuuang bilang “Isang daan at animnapu”

Lahat ay natutuwa, lahat ay nasasarapan

Sa mga nakahaing pagkain dito sa aming dulang

Malayo man sa mahal sa buhay o kay saya pa ring tunay

Kahit saan makarating pagpapala ng Diyos ay darating

Salamat, salamat Panginoon sa araw ng kapanganakan

Pagpapalang dulot akin ngang nakamtan

MGA KAIBIGAN SA TRABAHONG LAAN

By Nepthali Paraiso 24-July-13, 16:20pm

Sa bagong trabahong aking napasukan

Dito sa Asia, lugar ng Myanmar

Mabubuting tao aking naging kaibigan

Karamiha’y Pilipino kay saya ngang tunay

Mabuting pakikisama kailangay laan

Upang magkaroon ng magandang pagsasamahan

Maging totoo sa bawat tinuran

Upang magtagal ang pagkakaibigan

Di mo man lahat ay maging kaibigan

Dahil ibat-iba nga ang ugaling pinagmulan

Hindi naman lahat ika’y magugustuhan

May mga tao nga kasing ayaw mataasan

Kaya’t aking dalangin ang mabuting asal

Magpakatotoo sa lahat at walang kaplastikan

Gawin ang tama at trabahong dapat

Upang magkaroon ng pagsasamang maluwat

Dito sa trabaho may isang kababaihan

Ang sabi nga nila, pinaka magandang dalaga

Dahil nga nag-iisa kaya’t espesyal ang turing nila

Kaibigang matalik ang turing ko sa kanya

Lalunalyn ang pangalan ng babaing tinuran

Isang taga plano ng mga gawain sa trabaho

Laging kasama sa oras ng kainan

Maging sa merienda, at mga tumpukan

Pagkatapos ng trabaho, kamiy nagkakatahan

Minsan namay nagsasayawan at sa gym ay nagpapalakasan

Mga problema at suliranin na kanyang nararanasan

Pakikinig at Payo, opinion ko ma’y pinakikinggan

Marami pang kaibigan dito sa aking pinagtatrabahuhan

Sila’y may kanya kanyang buhay na aking nalaman

Masarap pakinggan at ibat ibang tagumpay

Tunay ngang magtagal pa ang aming pagsasamahan

AKING DALANGIN

By Nepthali Paraiso created 24-July-2013 15:40pm

Diyos na makapangyarihan, akin kitang pinasasalamatan

Sa panibagong buhay na iyong inilaan

Salamat sa pag-iingat sa buong magdamag

At sa panibagong araw na aming kinagisnan

Patawarin mo nga kami sa aming mga kasalanan

Mga bagay na hindi naging mabuti sa iyong harapan

Linisin mo nga kami ng iyong kapangyarihan

Upang kami’y maging karapat-dapat sa iyong paanan

Tulungan mo nga kami sa aming mga gawain

Ang Inyo ngang katalinuhan sa amin ay maibigay

Upang malaman ang tama at kamalian

Upang mailayo sa kasamaan at gawa ng kaaway

Inyo kaming patnubayan sa aming mga lalakaran

Ang Iyong subaybay ay aming maranasan

Palaso ng kaaway ay aming mapagtagumpayan

Upang sa pagtatapos ng araw kami ay Tagumpay

Sa aming mga mahal sa buhay na naiwan sa aming bahay

Kayo nga ang pumatnubay  magbigay sa kanila ng kalakasan

Inyo rin nga silang ilayo sa mga gawa ng kaaway

At kanilang maranasan ang tunay Nyong kapangyarihan

Patuloy mo ngang pagpapalain ang aming hanapbuhay

Itong mga kumpanyang aming pinapasukan

Patuloy mo silang pagpapalain at kami rin ay maginhawaan

At magpatuloy ang magandang  pagpapala sa kinabukasan

Sa aming mga kasama dito sa hanapbuhay

Dalangin namin ang pagsasama kalakip ang pagtutulungan

Kahit ibat-iba ang bansang pinagmulan

May pagkakaisa at kami’y nagkaka intindihan

Salamat o Dios sa lahat lahat ng bagay

Karapat dapat lang na ika’y pasalamatan

Hindi man namin masambit sa araw araw

Ikaw pa rin ang Aming Diyos na sasambahin  magpakailanman

PAG-UWI

Dalawang tulog na lang ikay aking masisilayan.

Bansa kong minulatan Perlas ng Silanganan.

Dalawamput walong araw, sa gitna ng karagatan.

Kay sarap muling balikan bansang pinagmulan.

Bakit nga ba binabalik balikan, kay hirap na bayan

Sa bansang pinanggalingan, trabaho’y kay gaan

Ano nga ba ang meron ka at laging na mi miss ka

Ang masayang pamilya, kaibigan at mga kasama

There’s no place like home ang sabi nga nila

Kahit mahirap basta sama-sama ang pamilya

Kahit nga magutom pa, basta’t intact ang bawat isa

Tulong tulong at pagkakaisa ito ay sumasapat na

Kung bakit nga ba naghahanap, ng mas malalaking kita

Ito ay dahil sa pangarap , mapaganda ang buhay pamilya

Sa mga nagsisipagsapalaran, hindi lahat ay maganda

Ibat-ibang karanasan, maririnig mo sa kanila

Itong aking kaibigan matagal na sa ibang bayan

Naiwang pamilya, hindi marunong humawak ng pera

Astang milyonarya, walang pakialam kung gumasta

Akala mo nama’y trabaho ng asawa ay magpulot lang ng pera

Ngunit hindi lahat nga ng karanasa’y tulad nila

Meron namang pamilya, magaling pagdating sa pera

Pinagtutuunan ng pansin ang pangangailangan nila

Ng sa kinabukasa’y , may natitira pa.

Kaya’t aking hiling sa mga ahensya, sa PDOS pa lang ay magawa na

Mga patungkol sa pamumuhunan, kinitang peray may paglagakan

Ng sa kinabukasan ay kanilang makita na may perang naitabi

Sa mga biglang pangangailangan ay mayroong makukuha

Edukasyon nga ang kailangan sa mga nagtatrabahong baguhan

Na hindi lang panghabang panahon na ikaw ay namamasukan

Kaya’t ang pag-iimpok ay tunay nating kailangan

Mag invest at magtabi ng pera upang sa kinabukasan ay may makukuha

PAGHIHINTAY

O Dios ika’y aking papupurihan

Sa bawat sandali ng aking buhay

Tunay na napakabuti mo, sa mga tumatawag sa Yo

Sa aming paghihintay, ay may tanging laan

Minsan di namin maarok, ang mga plano mo

Naiinip at nababagot sa mga sagot mo

At tunay nga sa tamang panahon

Doon namin malalaman, ang sagot mong pagkainam-inam

Tunay na ika’y dapat pasalamatan

At aming ipahayag ang iyong kabutihan

At sa mga taong naguguluhan

Ikaw ay dapat nilang, makilalang lubusan

Ipahahayag at sasambitin nitong aming mga labi

Ang tunay na kabutihan at ang Iyong kadakilaan

Sa mga pangyayari at karanasan nitong aming buhay

Sa ‘Yo lang natagpuan ang tunay na kapayapaan

Victoria Projects - Towers, Malate, Manila, Timog Slideshow Slideshow

Victoria Projects - Towers, Malate, Manila, Timog Slideshow Slideshow: TripAdvisor™ TripWow ★ Victoria Projects - Towers, Malate, Manila, Timog Slideshow Slideshow ★ to manila (near Cavite), Quezon City and Malateria. Stunning free travel slideshows on TripAdvisor

Pagpapala

Tunay kang Dakila Dios na mapagpala
Ako'y iyong iningatan mula sa aking tahanan
Nakarating sa pinagtatrabahuhan
May kagalakang laan

Nakatanggap ng parangal 
sa buwan ng Mayo'ng pinagpaguran
Pinakamataas na benta
akin na ngang nakuha

At sa aking pag-uwi 
nagdidilim na nga ang langit
Nagbabadyang bagyo 
dapat na nga ba kong tumakbo

Ni hindi mo hinayaan
Na ako'y abutan
Tinulot mong makasakay
Sa bus papuntang inuuwian

At sa aming paglalakbay
Kulog at kidlat ay nagsasabayan
Sobrang lakas ng ulan
Bumabaha ang mga daanan

Salamat talaga Lord sa iyong pag iingat
Nakarating ng malwalhati sa aming tahanan
At sa pagbaba sa sasakyan wala na nga ang ulan
Kaybuti mo o Panginoon karapat-dapat kang purihan.

AMA NG TAHANAN

Ama ng Tahanan – haligi ng sambahayan

Ika’y aming pararangalan sa iyong pagpapagal

Lakas ay ginagamit, upang iyong makamit

Pangangailangan ng Pamilya, sa kahirapan ay maisalba

Lagi mong nasa isip kinabukasan ng pamilya

Gagawin ang lahat, sa trabaho’y magsisikap

Di mo nga alintana, hirap na dinaranas

Para sa ming kinabukasan, lahat ay babatahin

Ika’y may angking talino, bigay ng Dios sa ‘yo

Sa mga pagdedesisyon, pananagutan at konsultasyon

Nakalaan ang iyong oras sa iyong mga anak

Nakikipaglaro, nagkukwentuhan, masayang pagsasamahan

Kung dumating man ang problema, sa loob ng pamilya

Nagiging matatag ka, takot ay di pinapakita

Mahinahong mong iisipin, ang tama at dapat na gawin

Bilang sandigan ng tahanan, ama naming pinakamamahal

Isa ka ngang huwaran na dapat naming sundan

Sa iba ngang anak, “Idol” ang tawag

Salamat sa pagmamahal, salamat sa pagbibigay

Ng aming pangangailangan, sa bawat panahon at araw

Pagpalain ka ngang tunay nitong ating Maykapal

Patnubayan ka nawa, sa lahat ng iyong ginagawa

Marami pang buhay at kalakasan, na iyong maranasan

Sa pagsasama natin tungo sa tagumpay!

Maligayang Araw ng mga Ama ng Tahanan.

PROGRESSIVE IEMELIF CHURCH SA ika-pitong anibersaryo

Muli na namang sasariwain

Taong nagdaan sa atin

Mga pagsasamang di malilimot

Mga gawaing para sa Diyos

Nang kami’y magsimula, sa napakaraming bata

Ano nga’t kay saya, lubos ang aming ligaya

Sa bahay ng mga Trilles, kami ay nag-umpisa

Bukas na pamilya, tahanang sa Diyos nakakilala

Ilang taong nagpagal, lugar ay di makaya

Sa dami ng bata pag DVBS, kailangang maghanap-hanap na

Kinausap ang home owners sa village, multi-purpose ay nakuha

Panibagong lugar, na mas malaki at masaya

Sa bawat panahon na nagdaan

Maraming pagsubok ang naranasan

Tulad din ng Israelita

Naniniwala sa lupanga Pangako Nya

Mula sa Multi-Purpose,

narito ang mga anak nya

Pamilya ng Ybanez at Baltasar

Pinagamit ang kanilang lugar

Nagpapatuloy, sumusulong

Maraming manggagawang sumusuong

Ginagawa ang tungkulin

Naglilingkod ngang giliw

Dapat ngang papurihan itong Dakilang Dios natin

Pagpapala at mga biyaya, sa kanya nagmula

Sa ikapitong taong pagpapagal, kagalakan ay lubusan

Eto nga’t nagdiriwang, sa ating bagong tahanan

Sa iyong pangalan, Progressive ngang matuturan

Sa patuloy na paglago, mga taong bumubuo

Nagpapagal, nagmamahal

Naglilingkod sa Kanyang Ngalan

Sa aking kaibuturan

Pagbati’t kagalakan

Kami’y inyong inanyayahan

Sa malaking pagdiriwang

Purihin ang Diyos na Dakila

Sa ikapitong taong pagpapala

Tunay ngang ating ibigay

Isang masigabong palakpakan

HAPPY 7^TH YEAR ANNIVERSARY PROGRESSIVE IEMELIF CHURCH

SA AMING MGA MAGULANG – ANG DAKILANG NANAY

created on May 12, 2012 7:45am at my bed reminiscing mothers love

Mula sa sinapupunan, kami’y inalagaan

Siyam na buwang nagtiis, sa loob palang kami’y makukulit

Kahit siya’y nahihirapan, nakita na agad ang pagmamahal

Hanggang sa aming paglabas, kandili mo’y di matatawaran

Sa bawat pag-iyak namin, ikaw ay naririyan

Laging nakatuon, sa bawat sandali ng panahon

Hindi mo ipinagkait, lahat ay ibinigay

Sa aming paglaki’y patuloy mong inalagaan

Hindi ka naging maramot, napakabait at masinop

Pilit mong itataguyod, hirap man ay kasunod

Kung para sa aming kinabukasan, kahit magkanda-utang utang

Basta’t makita mo lamang maging maayos aming pamumuhay

Sino nga bang Ina, ang hindi nagdusa?

Gagawin ang lahat, kung ito’y para sa kanyang anak

Kahit sa ating kamalian, pilit nilang pinagtatakpan

Wag ka lang masaktan, kahit buhay nila’y laan

Hindi nga matatawaran, hindi kayang bayaran

Mga pagpapagal at lakas na iyo ngang ibinibigay

Mga problemang dumarating, kabi-kabilang suliranin

Pilit mong itinatago, ni hindi ka sumusuko

Sa iyong tungkulin sa buhay, bakit gayon na lamang

Hindi kayang sukatin, ni hindi kayang bilhin

Lahat ng katangian na kailangan ng buhay

Pagtitiis, pagtyatyaga, pagmamahal, paghihirap at pagkalinga

Sa bawat yugto ng aming mga buhay

Aming alalahanin, pagpapakasakit mo sa amin

Ako nga’y humihiling sa aking mga giliw

Mahalin natin at kalingain itong dakilang Nanay natin

O Inay, Aming butihing Nanay

Salamat , maraming salamat sa iyong pagmamahal

Ito’y dakilang araw na aming laan

Upang ika’y dakilain at aming papurihin

Kaya’t aking dalangin, Buhay mo ay pagpalain

Pag-iingat ng Diyos, patnubayan ka ng lubos

Maraming taon pa, na ika’y aming makasama

Kalakasan, karunungan, iyo na ngang makamtan

MALIGAYANG ARAW NG MGA DAKILANG MAGULANG – AMING NANAY!

PARA SA MAHAL KONG INAY - Esperanza P. Paraiso

Sa dakilang araw, para sa aking mahal na Inay

Pagpapala ng Dios muli mong makamtan

Sa aming pagdiriwang, Ikaw tanging Inay

Na syang nagdugtong ng buhay, nag-aruga’t nagmahal.

Aking natandaan, nuong ako’y maliit pa lamang

Kasa-kasama ni Inay, sa palengke ng bayan

Maagang gumising, sa paghahanapbuhay ay kailangan

Sa pagluluto at pagtitinda, para sa aming pamilya

Hirap man ng buhay, pilit kaming iginapang

Makatapos ng pag-aaral, dalangin nya sa maykapal

Hindi sya tumitigil, patuloy na nakikipaglaban

Maisalba ang pamilya, maski sakit di alintana

Hirap na aming naranasan, Pangarap ang naging daan

Nagtaguyod ako sa pag-aaral, sa trabaho’y nagsikhay

Gusto kong maranasan ang pangarap ko sa magulang

Magkaroon ng magandang bahay, masaganang buhay maranasan

Kung ano nga ang iyong itinanim, iyon nga ang aanihin

Nagtyaga ka sa mga anak mo, pagpapala ay nakamtan mo

Nagkaroon ka man ng sakit, kamay ng Dios ang nag-alis

Kalakasan muling ibinigay, sa sakit ay nagtagumpay

Nakakalungkot mang isipin, ng si Itay ay kunin

Pangarap ko sa inyong bahay hindi nya nasilayan

Ngunit alam kong masaya sya, sa kanyang nakikita

Nakarating ka sa America, anak at apo mo’y nakasama

Daig mo pa sina ate, si Revy, BJ at Elsa

Nakasakay ka na ng eroplano, nakarating sa kabilang mundo

Marami ka pang mararanasan, kasaganaan sa buhay

Dalangin ko sa maykapal, patuloy na kalakasan

Patuloy akong nagpapasalamat, sa biyayang natanggap

Sa Dios na laging nagpapala’t sa pamilya ko’y nag-iingat

Marami pang taong dumating, sa Inay kong giliw

Sa araw na pagdiriwang, ika’y lagi sa aming isipan

ALA-ALA NG KABATAAN sa Damuhan

Noong ako ay bata pa, aking naaalala
Sa damuhan sa bukid, naglalaro sa twina
Maraming pangyayaring, sa isip naglipana
Walang problemang nadarama, sa kinagisnang probinsya

Pagkatapos ng anihan, sa pilapil nagtatakbuhan
Nagpapalipad ng saranggola, nagpapataasang sama-sama
Mga dayaming pinagkiskisan, aming ginagawang unan
Mga hinuha't, kaisipa'y, bawa't isa'y may laan

Sa gabi ng kasikatan, nitong malaking buwan
Naglalaro ng taguan, sa huni ng kulisap ay nagkakatakutan
Darating si Ingkong Lelong, at kami'y mag uumpukan
Magkwe kwento ng ano-ano, at tatakutin sa maligno

Sa aming pag-aaral, sa elementarya ng bayan
Natutong sumulat, nalaman ang panitikan
Masayang nag-aaral, maraming nalalaman
Sa silid-aklatan, na punong punong ng karunungan

Salamat sa pamahalaan, sa kanilang kagawaran
Edukasyong kailangan, ng bawat mag-aaral
Mga gurong nagtitiyaga, nagtitiis na kusa
Larawan ng kabayanihan, sa kanilang pagsisikhay

Sa damuhan, sa damuhan, ala-ala ng kabataan
Nagpipiknik, nagkakainan, handa ay mga gulay
Galunggong na isda, pinirito't may suka
Sarap ng aming kainan, sa dahong saging sa damuhan

Bagsik ng Panitik - A Munting Pakulo Literary Contest ~ Damuhan

Pasasalamat sa biyayang natanggap

Tunay na dakila at kahanga-hanga
Yaring pagkuha ng kailangang visa
'Di mo sukat akalain, na ika'y pagpalain
Nitong Diyos na laging sumasa-atin

Lubos na pananalig, sapat na pagtitiwala
Walang agam-agam, pangako Nya'y laan
Pagtawag sa Kanya, sa pananalangin ay dala
Kasagutan nya sa mga anak nya, tyak ay sobra-sobra

Lagi kong dinadalangin, na ako'y pagpalain
Sa lahat ng aking lakad, patnubay nyang ganap
Pagsubaybay sa lahat ng aking mga mithiin
Pangako nya sa akin, ako ay pagpapalain

Panay-panay ang dalangin, sa US Embassy na tatahakin
Mula sa embahada, mga consul na kakausapin
Maging alerto sa lahat, ng mga alituntunin
Upang maging maayos, sa prosesong gagawin

Sa mga katanungan, na konsul na kaharap
Pagsasagot nga katotohanan, walang pag-aalinlangan
Salamat sa katalinuhan, English ay nagsasalimbawan
Maraming katanungan, sagot ay laging laan

At sa katapos-tapusan, ako ay nabigla
Dahil nga sa visang aking inaaplayan
Mula sa C1D, ang sabi nya'y aking kailangan
B1 Visa ang dapat, at ito'y iyong matatanggap

At sa aking pagtalikod, panay panay ang pasasalamat
Higit sa aking inaasahan, sobra ang nakamtan
Tumawag kanina ang pinaglilingkurang ahensya
Pasasalamat na pinagkaloob, limang taon ang bisa

The BEST OF THE YEAR 2010

Isinulat ko ang tulang ito isang taon na ang nakaraan at muli ko syang natagpuan
Kaya't muling isasaysay, sa mambabasa'y may kapulutan
Itong pangyayari sa aking buhay na hindi dapat pagsisihan


the Lord has done great things and we rejoice... Psalms 126:3


Pagpupuri, pagdakila sa Diyos na mapagpala
Pagsamba, pagluwalhati, aking laging itatangi
Pasasalamat na mabuti, isasaysay iyong pagkandili
Mapapurihan at maitaas, Banal mong Pangalan hanggang wakas

Mula ng ako'y umuwi, galing sa Bansang Qatar
Mga plano ng Diyos sa akin hindi ko pa alam
Nakaranas ng matagal, trabahong hinihintay
Paghihintay, paghihintay hanggang kelan magtatagal

Mula Oktubre 2009, hanggang Agosto ng taong kasalukuyan
Maraming karanasan, aking napagdaanan
Nag-aaral ng kung ano-ano, dagdag kaalaman
Pinasok ang Edukasyon mga training na laan

Matapos ang summer class, trabaho sa Dubai'y nagbukas
Inayos mga papeles, excited na muling lumabas
Paghihintay sa kainipan, meron palang dahilan
Isang bagong oportunidad, na wala sa aking hinagap

Di' ko sukat akalain, Diyos ko'y may tanging hain
Isang kakaibang trabaho ang maglibot ng mundo
Ngunit kailangang makapasa sa interview ng kumpanya
Mula sa Scotland, English ko'y muling susubukan

Dumating ang araw, tatlo kaming isasaklang
Mga bigating aplikante, kailanga'y maging diskarte
Ngunit walang imposible, sa Diyos na mabuti
Alam nya kung kanino ibibigay ang trabaho

Panibagong simula, panibagong kabanata
Mula sa panlupa, sa karagatan naman magsisimula
Mula sa Asia, Middle East at Europa
Napuntahan ang South America, isasaysay kadakilaan nya

Sa mga bansang napuntahan, dala-dala'y kagalakan
Mga kakaibang karanasan, sabi nga'y pang mayaman lamang
Mga Five Star hotel na pinasukan, mga lugar ginalaan
Nasa tanang aking buhay, hindi ko pa naranasan

Ang mga nais ng puso ko, at mga panalangin ko
na malibot ang mundo ay unti-unti ngang pinagkakaloob mo
Pananangan sa iyong kapangyarihan, paghihintay ay kailangan
Sa tamang panaho'y ibibigay, kung lagi nga sa 'yo mananangan

Sa kabila ng tagumpay at mga pagpapalang taglay
Problema sa buhay aking naranasan
Mga plano ng Diyos sa akin di ko dapat madaliin
Pag-aasawa'y di biro at hindi dapat nilalaro

Humihingi ng kapatawaran ang mga naging pagkukulang
Mga pansariling nais ang resulta'y nakakainis
Nawala sa ministeryo upang aking mapagtanto
Katulad ni Apostol Pablo, iyon pala ang iyong plano?

Kaya't sa aking pag-iisa ay iyo ngang ipinakita
Walang problemang mararanasan, kung ikaw ay laging titingnan
Hindi pa huli ang lahat, problema sa iyo ay iniiyak
Maging maayos ang lahat at kaligayaha'y maging ganap

Inihingi ng tawad sa 'yo unang isiniwalat
Pagkakamali'y pwedeng ayusin hangga't maaga'y gawin
Akin na ngang inihayag sa balana ay nag-ulat
Desisyong aking ginawa, hiling ko'y pang-unawa

Tuna'y ngang kay Dakila, pagpapatawad mong gantingpala
Sa kabila ng nagawa, trabaho ko'y iyong pinagpala
Pangako mo sa akin, sa Genesis 12 aking ididiin
"Ang sa iyo'y magpala ay akin ding pagpapalain"

Kaya naman sa aking tinatangkilik, ika-sampung bahagi'y ibabalik
Patuloy mong palaguin, kaban ng yama'y punuin
Maging daluyan ng pagpapala at makatulong sa kapwa
Maging mabuting katiwala, sa binigay mong pagpapala

Kayo'y aking hinahamon, kaya nyo ring gawin
Bigyan ka ng sampung libo, isang-daan ipagkaloob mo
Maliit pa lang ang perang iyon at kung kaya pa natin
Bigyan ka ng limang libo, limang daan ang ibigay mo

Kung mananatili tayong tapat, hindi lang 'yon sapat
bibigyan ka ng limampung libo - limang libo ang ipagkaloob mo
Paano kung isang daang-libo at kalahating milyon ang dumating sa 'yo
Kaya mo pa bang ibigay para sa Diyos mo?

Paalam na...

Sa aming paglisan dito sa United Kingdom

Sa huling pagsakay sa barkong sinasakyan

Ako’y naging mabunga, mapagpala’t masaya

Sa isang taong pagtatrabaho sa minamahal kong barko

Kaya’t ikaw ay lilisan, papuntang Gitnang Silangan

Sa bagong pamamahala, sa mga bagong mukha

Patuloy kang gamitin, sa kanila’y pagpapala rin

Dalawangpu’t pitong taong din, sa UK ika’y nagmagaling

Kaya’t kami’y magpapaalam na, muling babalik sa mga ahensya

Damdaming nadarama may lungkot at saya

Di mapigilan ang luha at ito’y pumapatak na

O Alliance, O Alliance, minahal ka namin sa twina

Pasko ng OFW

 

Pasko na naman, ang mga OFW ay mag uuwian

Upang makapiling, kanilang mahal sa buhay

Maraming mga pasalubong, sa kanila ay laan

Pabango, laruan, at ibat-ibang gamit sa bahay

Inyo ngang makikita, mababanaag sa kanilang mata
May tuwa at saya at may sobrang excited pa
Ito nga ang panahon na kung saan nagtitipon

Ang Tatay, Nanay, si Ate at Kuya pati si Lolo at Lola

Anong tuwa’t anong saya, pagdating sa NAIA

Umaatikabong palakpakan sa eroplano’y naghihiyawan

Hindi mo maikakaila, ang kasayahan ng Madla

Problema ma’y dumating sa Pasko’y walang makakapigil

At sa terminal ng NAIA, pasko nga ay mababanaag na

May bandang naghihintay, awit ng Paskoy nagsasalimbayan
At sa iyong paglabas, ang mga mata mo’y naghahahanap
Pamilyang kumakaway sa dako pa roo’y naghihintay

Kumpleto na naman ang pamilya, sa ganitong okasyong masaya
Naghahanda para sa Noche Buena, masasarap na pagkai’y dala

Pagbibigayan ng regalo ang susunod na eksena

Bukas dito bukas doon, may monito-monita pa

Ngunit huwag nating kalilimutan, ang Mensahe ng Kapaskuhan

Kapanganakan ni Hesus doon sa abang sabsaban

Ipinadala ng Dios Ama upang atin ngang makita

Pagmamahal sa balana, sa Krus ay nagdusa

Pagbibigayan at pagmamahalan sa OFW ay kakitaan

Hindi lang pera-pera ang maging hangad sa twina

Pagtulong sa kapwa, sa mga nangangailangan ay handa ka

Upang lalo mong makamtan, Pasko ng puso’y anong yaman

Wanted: Friends

Qualifications: One of the following:

He/she should loves to cook, bake,

prepares juices and other drinks...

He/she should have time for

running/jogging in morning/evening

and joins fun run/marathon...

         He/she should love taking photographs and

loves to shoot, have time to go out to shoot for any topic...

He/she should love plants, likes  gardening...

He/she should be adventurous, out goer,  loves to travel anywhere (kkb)...

He/she should be a blogger,

knows anything when it comes to blogging...

tulad ni Pablong makatat manunulat (http://pablongmakatatmanunulat.blogspot.com)

at si pinoy sa earth (http://pinoysaearth.blogspot.com)

 

Ay hindi ko po sinasabing wala kayong ginagawa (lol!) hindi naman po dapat lahat alam nyo hehe one of those lang na pwede kong kasama sa shooting, sa pagluluto, sa galaan, etc. etc. matagal ang bakasyon ko ngayon yahooo

HIRAP NG MARINO

By Nepthali Paraiso

Sa aming paglalayag sa malayong dagat

Parang nangawala mga tao sa barko

Dahil ba sa lakas, ng along sumasambulat

Sa aming barko, ang mga tao’y nahihilo

Lumabas ng Scotland, panaho’y ‘di kay inam

At sa pagdating ng lugar, agad masimulan

Kaya naman lahat kami’y, animo’y nagkasakit

Nagsusuka, nahihilo, nagtulog sa kanya kanyang kwarto

Kaya’t inyong mapapapansin sa messhall namin

Sobrang daming pagkain, kakonti lang ng kumain

Garlic bread at spaghetti na aking kinain

Sa kinahapunan ay isinuka rin

Buti pa ang iba’y may panahong umidlip

Di ko naman maiwanan, itong opisinang pinagbilinan

Maging ang aking kwarto, ngayo’y may kasama na ako

Siyang natutulog at panggabi sa trabaho

Hindi na ko kumain, ng gabing iyon

Di mapalagay, hirap ang katawan

Kailangan ng lakas, kailangang lumaban

Kumain ng biscuit, konting ubas at tubig

Kaya’t ako’y dumalangin, kami’y pagpalain

Gabay at kalakasan, sa kinabukasan ay taglay

Panahon ay maging maayos, maging ang karagatan

Matapos ang proyekto ng walang peligro